VRYSTATERS het drie titels op die Suid-Afrikaanse senior pluimbalkampioenskap vandeesweek in Pretoria gebuit.

Chris Dednam (VS; eerste gekeur en verdedigende kampioen) het soos verlede jaar weer die mans-enkelspeltitel teen Wiaan Viljoen (VS; 2) verdedig, en na 'n titaniese stryd in drie stelle sy derde agtereenvolgende nasionale enkelspeltitel verower.

In die mans-dubbelspel het Chris en Roelof Dednam (VS; 1) die aanslag van Dorian en Enrico James (WP; 2) maklik in twee stelle afgeweer. Dit het aan die broers hul tweede, en aan Chris sy vyfde, agtereenvolgende nasionale dubbelspeltitel besorg.

Ook in die gemengde dubbelspel is die titel in een Vrystater se hande.
Johan Kleingeld (VS) en Marika Daubern (NG; 2) het Chris Dednam en Annari Viljoen (VS; 1) in die eindstryd in drie stelle geklop, om aan die ervare Kleingeld sy agtiende nasionale titel in dertien jaar te besorg. Dit het ook aan Daubern haar driekuns besorg nadat sy ook die vroue-enkelspeltitel van Viljoen weerhou het, en saam met Kerry-Lee Harrington (KZN; 2) die vroue-dubbelspel teen Antoinette Uys (O) en Viljoen (VS; 1) gewen het.

Annari Viljoen het in aldrie eindwedstryde aangetree, maar 'n titel was haar nie beskore nie. Vir die jongeling, wat vanjaar nog in die junior-afdeling was, was dit egter 'n buitengewone senior prestasie.